வானின் வண்ணங்கள்
மாற்றம் காணும் தருணங்கள்
தெரியாமலே போவதைப்போல்
சில பயணங்களும் சில தருணங்களில்
தெரியாமலே முடிந்து விடுவதுண்டு
முடிந்து போன பாதைகளை
தேடி ஓடாதீர்கள்
அங்கே காத்திருப்பது
சுவடுகள் மட்டுமே

நேர்மை

உடைந்த போதும்
மேகங்கள்
திசை மாற்றி போவதில்லை

முகவரி

சாலையோரம்
முகவரி தொலைத்த முகங்கள்
புன்னகையில் மலரும் பொழுது
தெரிகிறது
மகிழ்ச்சியின் முகவரி

தடங்கல்

இலையில் சிக்கி தவிக்கும்
துளிக்கு தெரியாது
இன்னும் சில நொடிகள்
கரையாமல் வாழ்வோம் என்று

சுதந்திரம்

கனவு கொண்டேன் என்றால்
கணவனை பற்றியா என்று
வருகிறது கேள்வி
இப்படியாக
பெண் சுதந்திரம்!

திடீர் மழை

குடை வைத்திருந்தவர்கள்
புத்திசாலிகள்
குடை இல்லாதவர்கள்
அதிர்ஷ்டசாலிகள்!

தன்னம்பிக்கை
தடைகளை உடைக்கவே
இதயங்களை அல்ல!

உங்கள் காட்சிப்பிழைக்கு
பலியாகும் நாங்கள் வாழ
கேட்டு நிற்கிறோம்
உங்கள்
ஒரு நொடியை மட்டும் -
அழகில்லாத உலகம்

காலம்

என்றும் விடியும் இன்றொன்றில்
நாளை என்பது வினாவே
அதை தேடி ஓடும் உன் காலங்களும்
நேற்றானபின் கனாவே

காட்சி

நிகழ்வது உன் விழியில்
நிகழ்ந்த பின் அதற்குள்
கணவாய் சென்று மறையாதா
இன்னொரு விழியில்
மெய்யல்ல நீயும்
கணவாய் மறைவாய் தெரியாதா